قیامِ پاکستان میں اقلیتوں کا کردار تاریخ کا روشن باب ہے، سنیہ صافی
جہلم: قومی یومِ اقلیت کے موقع پر ضلع کونسل ہال میں ایک خصوصی تقریب کا انعقاد کیا گیا، جس میں ایڈیشنل ڈپٹی کمشنر ریونیو سنیہ صافی نے بطور مہمانِ خصوصی شرکت کی۔
تقریب میں مختلف مذاہب سے تعلق رکھنے والے افراد، سول سوسائٹی کے نمائندگان اور طلبہ نے بھرپور شرکت کی۔
ایڈیشنل ڈپٹی کمشنر ریونیو سنیہ صافی نے اپنے خطاب میں کہا کہ قیامِ پاکستان میں اقلیتوں کا کردار تاریخ کا روشن باب ہے۔ پاکستان میں تمام مذاہب کو اپنی مذہبی رسومات کی ادائیگی کی مکمل آزادی حاصل ہے اور جشنِ آزادی ہمیں رنگ، نسل اور مذہب سے بالاتر ہو کر منانا چاہیے۔
تقریب سے آرچ بشپ ڈاکٹر جاوید اختر نے بھی خطاب کیا اور کہا کہ قیامِ پاکستان کے وقت مسیحی رہنما دیوان بہادر ایس پی سنگھا نے "سینے پر گولی کھائیں گے، پاکستان بنائیں گے” کا نعرہ لگاتے ہوئے اقلیتی ووٹ قائداعظمؒ کو دے کر پاکستان کے خواب کو حقیقت میں بدل دیا۔ آج مسیحی برادری کو اس ملک میں مکمل مذہبی آزادی حاصل ہے اور اس پر وہ خدا کی شکر گزار ہے۔
اس موقع پر بچوں نے ملی نغمے پیش کیے جبکہ جشنِ آزادی اور قومی یومِ اقلیت کے حوالے سے کیک بھی کاٹا گیا۔
