واقعہ کربلا حق و باطل کے درمیان ابدی لکیر ہے، چوہدری غلام احمد زمرد
جہلم کی معروف سیاسی و سماجی شخصیت سابق تحصیل ناظم چوہدری غلام احمد زمرد نے کہا ہے کہ نواسہ رسول سیدنا امام حسینؑ نے باطل کے سامنے سر جھکانے کے بجائے سر کٹانے کی ایسی لازوال مثال قائم کی جو قیامت تک کے لیے تاریخ میں امر ہو گئی ہے۔
انہوں نے کہا کہ سیدہ فاطمۃ الزہرا کے لعل نے اپنے لہو سے حق و باطل کے درمیان سچائی کی جو فیصلہ کن لکیر کھینچی، وہ رہتی دنیا تک مظلوموں کو حوصلہ اور جابروں کے خلاف ڈٹ جانے کا پیغام دیتی رہے گی۔
چوہدری غلام احمد زمرد کا کہنا تھا کہ چودہ سو سال گزر جانے کے باوجود واقعہ کربلا آج بھی لوگوں کے دل و دماغ میں زندہ ہے۔ امام عالی مقامؑ کی قربانی نے ثابت کر دیا کہ تاریخ میں وہی لوگ زندہ رہتے ہیں جو ظلم، جبر اور آمریت کے سامنے سر جھکانے کے بجائے حق پر قائم رہتے ہوئے اپنی جان کا نذرانہ دینے کا حوصلہ رکھتے ہیں۔
انہوں نے کہا کہ محرم الحرام ہمیں ہر سال اس عظیم قربانی کی یاد دلاتا ہے جو امام حسینؑ اور ان کے جانثار رفقاء نے میدان کربلا میں دی۔ وقت کی نزاکت اور حالات کی سنگینی کا تقاضہ ہے کہ ہم امام حسینؑ کے پیغام کو سمجھیں، اس سے سبق حاصل کریں اور اپنے معاشرے میں عدل، انصاف، حق گوئی اور مظلوموں کا ساتھ دینے جیسے اصولوں کو اپنائیں۔
چوہدری غلام احمد زمرد نے مزید کہا کہ امام حسینؑ کا پیغام تمام انسانیت کے لیے مشعل راہ ہے اور یہی پیغام ہمیں حق کے لیے ڈٹ جانے، ظلم کے خلاف آواز بلند کرنے اور اسلام کی اصل روح کو اپنانے کی تلقین کرتا ہے۔
