جہلم: حکومت عوامی فلاح و بہبود کے منصوبوں پر خصوصی توجہ دے رہی ہے، بلال اظہر کیانی

جہلم: وزیر مملکت برائے خزانہ و ریلوے بلال اظہر کیانی نے کہا ہے کہ "وچلہ بیلہ پل صرف ایک ڈھانچہ نہیں، بلکہ ترقی اور خوشحالی کی علامت ہے، جو بوکن اور اس کے گردونواح کے لوگوں کے لیے آسانیاں پیدا کرے گا”۔

وہ جہلم کی یونین کونسل بوکن میں واقع وچلہ بیلہ پل کی افتتاحی تقریب سے خطاب کر رہے تھے۔ افتتاحی تقریب میں سابق ایم پی اے چوہدری سعید اقبال، چوہدری بوٹا جاوید، مقامی مسلم لیگی رہنماؤں اور علاقہ مکینوں کی بڑی تعداد شریک ہوئی۔

بلال اظہر کیانی نے کہا کہ حکومت عوامی فلاح و بہبود کے منصوبوں کو ترجیح دے رہی ہے اور وچلہ بیلہ پل جیسے منصوبے دور دراز علاقوں کو ترقی کے مرکزی دھارے میں شامل کرنے کی سنجیدہ کوشش کا حصہ ہیں۔

انہوں نے پل کی بروقت تکمیل پر مقامی افراد اور ضلعی انتظامیہ کی کاوشوں کو سراہا اور کہا کہ ان کی انتھک محنت سے یہ منصوبہ ممکن ہو سکا۔ آخر میں وزیر مملکت نے عوام کو یقین دہانی کرائی کہ حکومت علاقے کی بنیادی ضروریات کو پورا کرنے کے لیے مزید ترقیاتی منصوبوں پر بھی کام کر رہی ہے۔

یاد رہے کہ وچلہ بیلہ پل کی تعمیر سے نہ صرف مقامی آبادی کو آمدورفت میں سہولت میسر آئے گی بلکہ اس سے علاقے میں معاشی سرگرمیوں کو بھی فروغ ملے گا۔