بحیثیت معلم ہماری اہم ذمہ داری ہے کہ طلباء کی تعلیم کے ساتھ ساتھ تربیت بھی کریں، محمد امون خالد
جہلم: اسسٹنٹ ایجوکیشن آفیسر مرکز جہلم محمد امون خالد نے اسکولوں میں طلباء کے غیر اخلاقی رویے، خاص طور پر کاغذ پھاڑ کر پھینکنے کے رجحان کے خلاف سخت نوٹس لیتے ہوئے فوری اقدامات کرنے کی ہدایت جاری کی ہے۔
انہوں نے تمام سرکاری و نجی اسکولوں کو پابند کیا ہے کہ اسمبلی کے وقت اور کلاسز میں طلباء کو صفائی نصف ایمان کے بارے میں خصوصی لیکچرز دیے جائیں تاکہ انہیں صفائی کی اہمیت اور اس کے فوائد سے آگاہ کیا جا سکے۔ ان کا کہنا تھا کہ ایک معلم کی ذمہ داری صرف تعلیم دینا نہیں بلکہ طلباء کی اخلاقی تربیت کرنا بھی ہے تاکہ وہ ایک ذمہ دار اور کارآمد شہری بن سکیں۔
انہوں نے کہا کہ چھٹی کے وقت اساتذہ طلباء کے بیگز چیک کریں تاکہ اس غیر مہذب رجحان پر قابو پایا جا سکے۔ انہوں نے اساتذہ کو تلقین کی کہ وہ طلباء میں نظم و ضبط اور صفائی کے شعور کو اجاگر کرنے کے لیے خصوصی توجہ دیں اور اسکولز کے ماحول کو صاف ستھرا رکھنے کے لیے سختی سے عملدرآمد کروائیں۔
