جہلم: انتظامیہ تجاوزات ختم کروانےمیں مصروف، میرج ہالوں میں ون ڈش کی خلاف ورزیاں عروج پر
جہلم: ضلع جہلم میں انتظامیہ تجاوزات کے خاتمے کی مہم میں مصروف ہے، جبکہ دوسری جانب شہر اور گردونواح میں مارکیوں اور میرج ہالز میں ون ڈش کی خلاف ورزیاں عروج پر پہنچ گئی ہیں۔
انتظامیہ پچھلے چند دنوں سے تجاوزات کے خلاف بڑے پیمانے پر کارروائیاں کر رہی ہے۔ تجاوزات مافیا کے قبضے سے کروڑوں روپے مالیت کی سرکاری اراضی واگزار کرائی جا چکی ہے۔
انتظامیہ نے دکانداروں کو تنبیہ کی ہے کہ وہ رضاکارانہ طور پر سرکاری راستوں اور املاک پر کیے گئے قبضے ختم کر دیں، بصورت دیگر ان کے دکانوں کے باہر بنے شیڈز مسمار کر دیے جائیں گے اور سرکاری راستے واگزار کرائے جائیں گے۔
انتظامیہ کی توجہ تجاوزات کے خلاف کارروائیوں پر مرکوز ہونے کے باعث شہر اور مضافاتی علاقوں کے میرج ہالز اور مارکی مالکان نے ون ڈش پالیسی کی کھلم کھلا خلاف ورزی شروع کر دی ہے۔ رپورٹس کے مطابق باراتیوں کے لیے کئی کئی ڈشز تیار کی جا رہی ہیں، جس سے قانون کی دھجیاں اڑائی جا رہی ہیں۔
علاقے کی سماجی، مذہبی، شہری اور فلاحی تنظیموں کے عمائدین نے ون ڈش پالیسی کی خلاف ورزی پر سخت تشویش کا اظہار کیا ہے۔ ان کا کہنا ہے کہ انتظامیہ کو تجاوزات کے خاتمے کے ساتھ ساتھ میرج ہالز اور مارکیوں میں قانون کی خلاف ورزیوں پر بھی سخت ایکشن لینا چاہیے۔
شہریوں نے وزیراعلیٰ پنجاب مریم نواز شریف، چیف سیکرٹری پنجاب اور سیکرٹری بلدیات سے فوری نوٹس لینے کا مطالبہ کیا ہے۔ ان کا کہنا ہے کہ ون ڈش پالیسی کا نفاذ یقینی بنایا جائے اور خلاف ورزی کرنے والوں کے خلاف سخت قانونی کارروائی کی جائے تاکہ قانون کی پاسداری کو یقینی بنایا جا سکے۔
