سوئی گیس کی عدم دستیابی کے باوجود بھاری بلوں نے عوام کی چیخیں نکلوا دیں

جہلم شہر اور ملحقہ علاقوں میں سوئی گیس کی عدم دستیابی کے باوجود گیس کے بلوں میں ہوشربا اضافے نے صارفین کو شدید پریشانی میں مبتلا کر دیا ہے۔ 24 گھنٹوں کے دوران صرف صبح، دوپہر اور شام میں بمشکل دو گھنٹے گیس فراہم کی جاتی ہے، جبکہ صارفین کو ہزاروں روپے کے بل موصول ہو رہے ہیں، جس کی وجہ سے لوگ سراپا احتجاج ہیں۔

تفصیلات کے مطابق سوئی ناردرن گیس پائپ لائن کمپنی نے گیس کے ٹیرف میں کئی گنا اضافہ کر دیا ہے۔ مہنگائی کے اس دور میں غریب عوام پہلے ہی کسمپرسی کی زندگی گزارنے پر مجبور ہیں۔ گرمیوں میں بجلی کی اعلانیہ اور غیر اعلانیہ لوڈ شیڈنگ اور بڑھتی ہوئی قیمتوں نے عوام کو پریشان کر رکھا تھا، اور سردیوں کے آغاز پر گیس کے نرخوں میں اضافے کے ساتھ بھاری بل بھیج کر عوام کو مزید مشکلات میں ڈال دیا گیا ہے۔

شہری حلقوں کا کہنا ہے کہ بعض علاقوں میں 24 گھنٹوں میں شاید ہی صبح، دوپہر اور شام کے اوقات میں صرف دو دو گھنٹے گیس فراہم کی جاتی ہے، جبکہ بیشتر علاقوں میں گیس مکمل طور پر غائب ہے۔ اعلانیہ اور غیر اعلانیہ 16 گھنٹے کی لوڈ شیڈنگ کے باوجود، وہ صارفین جو پہلے 500 روپے تک کے بل ادا کرتے تھے، اب انہیں 5000 سے 6000 روپے تک کے بل بھیجے جا رہے ہیں۔

شہریوں کا کہنا ہے کہ حکومت نے گیس کے بلوں میں بے پناہ اضافہ کرکے عوام کی مشکلات میں اضافہ کیا ہے۔ حکومت کو اپنی غیر ضروری اخراجات میں کمی کرنی چاہیے اور عوام کو ریلیف فراہم کرنا چاہیے، تاکہ غریب طبقہ اپنے بچوں کے لیے دو وقت کی روٹی کا انتظام کر سکے۔