سستا رمضان بازار شہریو ں کیلئے بڑی سہولت ہے، ڈپٹی کمشنر جہلم سمیع اللہ فاروق
جہلم: سستا رمضان بازار شہریو ں کیلئے بڑی سہولت ہے یہاں تمام اشیاء خوردو نوش انتہائی مناسب قیمتوں پر ہر شہری کیلئے دستیاب ہیں۔
ان خیالات کا اظہار ڈپٹی کمشنر جہلم کیپٹن (ر) سمیع اللہ فاروق نے رمضان سہولت بازار کا دورہ کرتے ہوئے کہی۔ اس موقع پر اسسٹنٹ کمشنر جہلم مبین احسن اور میونسپل کمیٹی حکام نے ڈی سی جہلم کو رمضان بازار میں دستیاب اشیاء، قیمتوں اور شہریوں کیلئے سہولیات بارے بریفنگ دی۔
ڈپٹی کمشنر جہلم نے مختلف سٹالز پر جاکر سبزیوں، پھلوں، گوشت اور دیگر اشیا کی کوالٹی اور قیمتوں کو چیک کیا اور خریداری کیلئے آئے ہوئے شہریوں سے رمضان بازار بارے گفتگو کرتے ہوئے کہا کہ حکومت پنجاب کی جانب سے سستے بازار قائم کئے گئے ہیں تاکہ ہرشہری مناسب قیمت پر اپنی ضرورت کا سامان خرید سکے، رمضان بازار میں اشیا کی کوالٹی پر کوئی سمجھوتہ نہیں کیا جائے گا۔
ڈی سی جہلم کیپٹن (ر) سمیع اللہ فاروق نے رمضان سہولت بازار کا دوبارہ دورہ کرتے ہوئے کہا کہ رمضان سہولت بازار میں تمام اشیاء کے معیار اور ریٹ پر کڑی نظر ہے روزانہ سینکڑوں شہری یہاں سے ضرورت کی اشیاء با آسانی حاصل کر رہے ہیں انتظامی افسران ہمہ وقت یہاں عوام کی خدمت کیلئے موجود ہیں۔
اس موقع پر ان کے ہمراہ ایڈیشنل ڈپٹی کمشنر جنرل صبا سحر اور دیگرافسران بھی موجود تھے.
ڈی سی جہلم نے الگ الگ سٹالز پر جا کر فروخت کیجانے والی اشیاء کو خود چیک کیا اور وہاں خریداری کرنے والے شہریوں سے رمضان سہولت بازار کی افادیت اور شکایات ومسائل بارے گفتگو کی.
