جہلم شہر کی سڑکوں پر تجاوزات مافیا کا راج، انتظامیہ تجاوزات مافیا کے سامنے بے بس
جہلم شہر میں تجاوزات مافیا کے سامنے انتظامیہ بے بس، انتظامیہ کی کمزور گرفت کی وجہ شہر کی سڑکوں پر تجاوزات مافیا کا راج، شہر کے تمام بینک، نجی ہسپتالوں ، نجی تعلیمی اداروں ، کارروباری مراکز کے باہر غیر قانونی پارکنگ اسٹینڈز قائم، میونسپل کمیٹی کی حدود میں جگہ جگہ پارکنگ اسٹینڈ زقائم ہیں۔
جہلم شہر کی اہم سڑکوں، بازاروں، گلیوں، چوک چوراہوں میں با قاعدہ طور پرمالکان نے اپنے کارروباری مراکز کے باہر سامان سڑکوں سجا کر کارروبار شروع کررکھے ہیں. رہی سہی کسر مین بازار کے دکانداروں نے نکال دی ہے۔ جگہ جگہ ریڑھیاں کھڑی کرکے روزانہ کی بنیاد پر ریڑھی بانوں سے کرایہ وصول کرلیا جاتا ہے جس کیوجہ سے خریداروں کا بازاروں سے گزرنا محال ہو چکاہے۔
مین بازار، نیا بازار، کناری بازار، دلہن بازار، تحصیل روڈ، مشین محلہ روڈ، ریلوے روڈ، چوک گنبد والی مسجد، محمدی چوک ، میجر اکرم شہید روڈ سمیت دیگر چوک چوراہوں اور ملحقہ علاقوں میں تجاوزات کی بھرمار ہو چکی ہیں۔ دکاندار صبح سے با قاعدہ اپنی دکانوں کا سامان سڑکوں پر رکھ لیتے ہیں۔ تجاوزات کی گھمبیر صورتحال سے شہری سخت اذیت کا شکار ہو رہے ہیں۔
اندرون شہر سمیت دیہی علاقوں میں بھی شہریوں کو سخت مشکلات کا سامنا کرنا پڑ رہا ہے تجاوزات قائم کرنے والے افراد بلا خوف و خطر سرکاری سڑکوں ، راستوں پر قبضے کرکے کارروباری سرگرمیاں جاری رکھے ہوئے ہیں لیکن انتظامیہ کی طرف سے تجاوزات مافیا کیخلاف کارروائیاں کرنے والے ذمہ داران خاموش تماشائی کا کردار ادا کررہے ہیں۔
میونسپل کمیٹی کا شعبہ انکروچمنٹ کا عملہ تہہ بازاری کے نام پر تجاوزات مافیا کی سرپرستی کرتا دکھائی دیتاہے۔ انتظامیہ تجاوزات مافیا کے خلاف کارروائیاں کرنے کی بجائے خاموش تماشائی کا کردار ادا کررہی ہے ۔
شہریوں نے ارباب اختیار سے اصلاح و احوال کا مطالبہ کیا ہے۔
