پاکستانی طلبہ بھارتیوں پر سبقت لے گئے
پاکستانی طلبہ نے ایک بار پھر تعلیم کے میدان میں بھارتیوں کو پیچھے چھوڑ دیا ہے۔
مائیکرو بلاگنگ ویب سائٹ ایکس پر یورپی یونین کے ہینڈل سے ایک ویڈیو کی صورت میں جوائنٹ ماسٹرز پروگرام کے لیے ایرازمُس منڈوس اسکالر شپ 2024 کے نتائج جاری کیے گئے۔
اس اسکالر شپ کے لیے رواں برس 137 ممالک سے 2 ہزار 603 طلبہ کو منتخب کیا گیا۔ پاکستانی طلبہ نے بھارت سمیت کسی بھی دوسرے ملک کو پیچھے چھوڑتے ہوئے سب سے زیادہ اسکالر شپس حاصل کیں جن کی تعداد 189 ہے۔اس میں خوش آئند بات یہ بھی ہے کہ منتخب شدہ پاکستانی طلبہ میں اسکالر شپ حاصل کرنے والی 47 فیصد طالبات ہیں۔
یوں اسکالر شپ کی تعداد کے لحاظ سے پاکستان کا نمبر دنیا بھر میں اول رہا۔اس کے بعد بھارتی طلبہ نے دوسرے نمبر پر 146، میکسیکن طلبہ نے 121، بنگلہ دیشی طلبہ نے 119، نائیجیرین طلبہ نے 97 اور برازیلین طلبہ نے 84 اسکالر شپس حاصل کیں۔ یہ مسلسل تیسرا سال ہے کہ اسکالر شپ حاصل کرنے والے ممالک میں پاکستان کا نمبر پہلا ہے جو ایک مثبت رجحان ہے۔
#ExcitingNews:🇵🇰 Pakistan (once again) secures the most #ErasmusMundus scholarships globally!👏
189 🇵🇰 students are awarded 🇪🇺 @EUErasmusPlus scholarships this year, followed by India 🇮🇳(146), Mexico 🇲🇽(121), Bangladesh 🇧🇩(119), Nigeria 🇳🇬(97) & Brazil🇧🇷 (84). Congratulations 🇵🇰! pic.twitter.com/nvGugYsA9D— EUPakistan (@EUPakistan) July 5, 2024
اسکالر شپس حاصل کرنے کے بعد یہ طلبہ پورے یورپ کے مختلف تعلیمی اداروں میں تعلیم حاصل کریں گے۔ یورپی یونین کے وفد نے اسکالر شپ حآصل کرنے والے طلبہ کو مبارکباد دیتے ہوئے مستقبل کی کامیابیوں کے لیے نیک خواہشات کا اظہار کیا۔
