حکومت تعلیمی اداروں میں سہولیات کی فراہمی اور بہترین تعلیمی ماحول یقینی بنانے کیلئے متحرک ہے، ڈپٹی کمشنر جہلم
جہلم: تعلیمی اداروں میں سہولیات کی فراہمی اور بہترین تعلیمی ماحول یقینی بنانے کے لیے پنجاب حکومت متحرک ہے۔ اس سلسلے میں تعلیمی اداروں کی مسلسل انسپکشن کا عمل جاری ہے۔
ان خیالات کا اظہار ڈپٹی کمشنر جہلم میثم عباس نے الطاف حسین ہائی سکول اور ایم سی سکول بورڈنگ محلہ کے دورے کے دوران کیا۔ ڈپٹی کمشنر نے مختلف کلاس رومز کا دورہ کرتے ہوئے طلبا و طالبات سے ملاقات کی اور ان کی تعلیمی سرگرمیوں کے بارے میں تفصیلی آگاہی حاصل کی۔
انہوں نے طلباء سے تعلیمی معیار، سکول کی سہولیات اور ان کے مسائل پر گفتگو کی۔
اس موقع پر ڈپٹی کمشنر نے کہا کہ تعلیم کی بہتری حکومت کی اولین ترجیح ہے اور تعلیمی اداروں میں سہولیات کی فراہمی اور ان کے مسائل کا فوری حل یقینی بنایا جا رہا ہے۔ انہوں نے سکول انتظامیہ کو ہدایت کی کہ طلبا کو معیاری تعلیم فراہم کرنے اور انہیں بہترین ماحول مہیا کرنے کے لیے تمام وسائل بروئے کار لائے جائیں۔
