ڈپٹی کمشنر جہلم کا فصلوں کی باقیات جلانے والوں کے خلاف سخت کارروائی کا حکم، آلودگی پر زیرو ٹالرنس پالیسی نافذ
جہلم: ڈپٹی کمشنر جہلم میر رضا اوزگن کی زیر صدارت ضلعی انتظامیہ اور متعلقہ محکموں کا اہم اجلاس منعقد ہوا، جس میں سموگ سے بچاؤ کے لیے حکمت عملی کا جائزہ لیا گیا۔
ڈی سی جہلم نے متعلقہ محکموں کو حکومتی احکامات پر سو فیصد عمل درآمد یقینی بنانے کی سخت ہدایات جاری کیں۔ انہوں نے فصلوں کی باقیات جلانے پر زیرو ٹالرنس پالیسی اپناتے ہوئے ملوث افراد کے خلاف سخت قانونی کارروائی کا حکم دیا۔
اجلاس میں اینٹوں کے بھٹوں کو زِگ زیگ ٹیکنالوجی پر منتقل نہ ہونے کی صورت میں فوری بند کرنے اور دھواں چھوڑنے والی گاڑیوں کے خلاف مہم تیز کرنے کی ہدایات دی گئیں۔ تعمیراتی مقامات پر دھول کو روکنے کے لیے پانی کا چھڑکاؤ اور حفاظتی اقدامات کو یقینی بنانے کی بھی ہدایت دی گئی۔
مزید براں شہریوں میں سموگ کے مضر اثرات اور احتیاطی تدابیر کے حوالے سے مؤثر آگاہی مہم چلانے کا فیصلہ کیا گیا۔
ڈی سی جہلم نے واضح کیا کہ تمام محکمے باہمی تعاون کو فروغ دیں اور کسی قسم کی غفلت برداشت نہیں کی جائے گی جبکہ تمام اقدامات کی روزانہ کی بنیاد پر رپورٹ بھی طلب کر لی گئی ہے۔
