کھیوڑہ نہر پل کے قریب دن دیہاڑے مسلح ڈکیتی، سیلز مین سے لاکھوں روپے لوٹ لیے گئے

پنڈدادنخان: کھیوڑہ نہر پل کے قریب دن دیہاڑے مسلح ڈکیتی، سیلز مین سے لاکھوں روپے لوٹ لیے گئے

پنڈ دادنخان: کھیوڑہ نہر پل کے قریب دن دیہاڑے ہونے والی مسلح ڈکیتی کی واردات نے علاقے کے امن و امان پر سنگین سوالات کھڑے کر دیے ہیں۔ نامعلوم مسلح ملزمان نے اسلحے کے زور پر نیسلے کمپنی کے سیلز مین سے پانچ لاکھ 23 ہزار روپے نقدی چھین لی اور موقع سے فرار ہو گئے۔

جہلم کی تحصیل پنڈدادنخان میں نیسلے کمپنی کے سیلز مین اشرف اور سجاول معمول کے مطابق اپنی ڈیوٹی انجام دے رہے تھے کہ اس دوران موٹر سائیکل 125 پر سوار مسلح افراد نے ان کا تعاقب شروع کر دیا۔

کھیوڑہ نہر پل کے قریب پہنچ کر ملزمان نے انہیں روک لیا اور خوف و ہراس پھیلانے کے لیے ہوائی فائرنگ کے بجائے پاؤں کے قریب فائر کیے تاکہ کسی قسم کی مزاحمت نہ ہو سکے۔

ملزمان اسلحے کے زور پر 5 لاکھ 23 ہزار روپے نقدی چھین کر فرار ہو گئے۔ خوش قسمتی سے واقعے میں کوئی جانی نقصان نہیں ہوا، تاہم دن دیہاڑے پیش آنے والی اس واردات کے بعد علاقے میں شدید خوف و ہراس پایا جاتا ہے۔

شہریوں اور تاجر برادری کا کہنا ہے کہ یہ واقعہ اس بات کا واضح ثبوت ہے کہ علاقے میں پولیس گشت اور نگرانی کا نظام ناکافی ہے۔ اہل علاقہ نے قانون نافذ کرنے والے اداروں سے مطالبہ کیا ہے کہ ملزمان کو فوری طور پر گرفتار کیا جائے، متاثرین کو انصاف فراہم کیا جائے اور کھیوڑہ و گردونواح میں مؤثر سیکیورٹی انتظامات کیے جائیں۔

پولیس کے مطابق واقعے کی تفتیش جاری ہے، تاہم تاحال کسی ملزم کی گرفتاری عمل میں نہیں آ سکی۔ شہری حلقوں نے خبردار کیا ہے کہ اگر بروقت اور سخت کارروائی نہ کی گئی تو ایسے واقعات میں مزید اضافہ ہو سکتا ہے۔