سی سی ڈی کی جرائم پیشہ عناصر کے خلاف کارروائیاں قابلِ تحسین و تقلید ہیں، چوہدری عابد محمود

جہلم: چیئرمین جہلم پریس کلب چوہدری عابد محمود نے کرائم کنٹرول ڈیپارٹمنٹ (CCD) پنجاب کی کارکردگی کو سراہتے ہوئے کہا ہے کہ یہ وزیر اعلیٰ پنجاب مریم نواز شریف کے ویژن کا عملی مظہر ہے۔

انہوں نے کہا کہ سی سی ڈی کی قیادت ایڈیشنل آئی جی سہیل ظفر چٹھہ جیسے پروفیشنل اور باصلاحیت افسران کے ہاتھ میں ہے، جنہوں نے پنجاب کو جرائم سے پاک کرنے کا تہیہ کر رکھا ہے۔

چوہدری عابد محمود نے کہا کہ سی سی ڈی کی جانب سے پنجاب بھر میں غنڈہ گردی، بدمعاشی، منشیات فروشی، ڈکیتی، اغواء، تاوان کے لیے اغواء، سٹریٹ کرائمز، قبضہ مافیا اور بھتہ خوری جیسے جرائم کے خلاف جو مربوط، جدید اور فیصلہ کن کارروائیاں شروع کی گئی ہیں، وہ نہ صرف قابلِ تحسین بلکہ قابلِ تقلید بھی ہیں۔

انہوں نے مزید کہا کہ سی سی ڈی نے معاشرتی بگاڑ خصوصاً نوجوان نسل میں پروان چڑھنے والی اسلحہ کلچر، طاقت کے مظاہرے اور جعلی پروٹوکول کی حوصلہ شکنی کر کے نوجوانوں کو حقیقی معنوں میں انسانیت، نظم و ضبط اور امن کا درس دینا شروع کر دیا ہے۔

چوہدری عابد محمود نے اس امید کا اظہار کیا کہ ان کوششوں کے نتیجے میں پنجاب بہت جلد امن کا گہوارہ بن جائے گا۔ انہوں نے وزیر اعلیٰ پنجاب مریم نواز شریف، انسپکٹر جنرل پولیس پنجاب ڈاکٹر عثمان انور، سی سی ڈی پنجاب کے سربراہ سہیل ظفر چٹھہ اور ان کی پوری ٹیم کو خراجِ تحسین پیش کیا اور ان کے لیے نیک تمناؤں کا اظہار کیا۔