جہلم میں جی ٹی روڈ پر کار اور شہ زور ٹرک میں تصادم، پانچ افراد زخمی

جہلم میں کار اور شہ زور ٹرک میں تصادم کے نتیجے میں کار میں سوار پانچ افراد زخمی ہوگئے۔تمام افراد کو سول اسپتال منتقل کردیا گیا۔ تین افراد کی حالت تشویشناک بتائی جارہی ہے۔

تفصیلات کے مطابق جہلم میں جی ٹی روڈ جادہ کے مقام پر ایک افسوسناک ٹریفک حادثہ پیش آیا، جہاں ایک کار اور شہ زور ٹرک کے درمیان تصادم ہوا۔ حادثے کے نتیجے میں کار میں سوار پانچ افراد شدید زخمی ہو گئے جنہیں فوری طور پر ڈی ایچ کیو اسپتال جہلم منتقل کر دیا گیا۔

حادثہ اس وقت پیش آیا جب ایک کار کی بریک فیل ہو گئی اور وہ بے قابو ہو کر سڑک کی دوسری جانب جاتے ہوئے ایک شہ زور ٹرک سے ٹکرا گئی۔ حادثے کے فوراً بعد ریسکیو 1122 کی ٹیمیں موقع پر پہنچ گئیں اور امدادی کارروائیاں شروع کر دیں۔ ریسکیو اہلکاروں کے مطابق کار میں سوار تمام افراد شدید زخمی ہو کر گاڑی میں پھنس گئے تھے، جنہیں گاڑی کاٹ کر نکالا گیا۔

ریسکیو ذرائع کے مطابق زخمیوں میں 16 سالہ فیضان ولد شہباز لودھی، 17 سالہ سید بازل ولد سید عباس، 38 سالہ نصیر ولد سید اکبر، 27 سالہ اسامہ ولد نواز اور 34 سالہ واجد ولد زاکر حسین شامل ہیں۔

تمام زخمیوں کو ابتدائی طبی امداد فراہم کرنے کے بعد اسپتال منتقل کر دیا گیا۔ اسپتال ذرائع کے مطابق تین زخمیوں کی حالت نازک ہے اور انہیں طبی امداد دی جا رہی ہے۔

ریسکیو حکام کے مطابق حادثہ کار کی بریک فیل ہونے کے باعث پیش آیا، جس کی وجہ سے گاڑی بے قابو ہو کر شہ زور ٹرک سے جا ٹکرائی۔