جہلم کا ایک اور بہادر سپوت وطن عزیز پر قربان ہو گیا

جہلم کا ایک اور بہادر سپوت وطن عزیز پر قربان ہو گیا، شہید کو پورے فوجی اعزاز کے ساتھ سپرد خاک کر دیا گیا۔

تفصیلات کے مطابق جہلم کی تحصیل پنڈدادنخان کے علاقے ہرنپور کا رہائشی ایف سی بلوچستان کا جوان سید ذوالقرنین حیدر وطن کی حفاظت کی خاطر دشمنوں سے لڑتے ہوئے مادر وطن پر قربان ہو گیا۔

شہید ذوالقرنین حیدر ایک فرض شناس سپاہی تھا۔ شہید نے سوگواران میں ماں، تین ماہ کے ننھے بیٹے، بہن اور بیوہ اہلیہ کو چھوڑا ہے۔ وہ اپنی بہن کے اکلوتے بھائی تھے۔

شہید سید ذوالقرنین حیدر شاہ کا جسد خاکی ہرن پور پہنچا تو اہل علاقہ نے پھولوں سے بھرپور استقبال کیا۔

شہید کی نمازِ جنازہ ہرنپور میں ادا کی گئی جس میں اہل علاقہ، سول سوسائٹی، پاکستان رینجرز اور ایف سی کے افسران و جوانوں کی بڑی تعداد نے شرکت کی۔ نمازِ جنازہ کے بعد شہید کو پورے فوجی اعزاز کے ساتھ سپردِ خاک کیا گیا۔

پاکستان رینجرز کے چاق و چوبند دستے نے شہید کو سلامی پیش کی جبکہ ان کی قبر پر پھولوں کی چادر چڑھائی گئی۔

سید ذوالقرنین شاہ کی شہادت پر اہل علاقہ کا کہنا تھا کہ زوالقرنین شاہ نے اپنی جان دے کر اہلِ وطن کی جانیں بچائیں اور وہ ہمیشہ قوم کے دلوں میں زندہ رہیں گے۔ ان کی قربانی آنے والی نسلوں کے لیے مشعل راہ ہے۔