سردیو ں کی آمد کے ساتھ ہی سوئی گیس کی طویل بندش شروع، گیس بلوں نے صارفین کو حواس باختہ کر دیا
جہلم شہر اورملحقہ علاقوں میں سردیو ں کی آمد کے ساتھ ہی سوئی گیس کی پچھلے کئی ہفتوں سے طویل بندش اور سوئی گیس کے ظالمانہ نرخوں نے صارفین کو حواس باختہ کر دیا، ہزاروں گھرانے مہنگی لکڑیاں جلا کر کھانا پکانے پر مجبور ہیں۔
تفصیلات کے مطابق جہلم شہر اور ملحقہ علاقوں میں موسم سرماکے ساتھ ہی سوئی گیس پچھلےکئی ہفتوں سے مسلسل نہیں آرہی اور جن علاقوں میں گیس آ رہی ہے وہاں بھی گیس کی لوڈ شیڈنگ کی طویل بندش کی وجہ سے صارفین کے چولہے ٹھنڈے پڑ چکے ہیں۔
محکمہ سوئی گیس میں شکایات کر کر کے صارفین تھک چکے ہیں مگر محکمہ سوئی گیس کے ذمہ داران کے کانوں پر جوں تک نہیں رینگی۔
سوئی گیس استعمال کرنے والے ایک صارف عنصر منیر نے میڈیا کو بتایا کہ محکمہ سوئی نادرن گیس کے اہلکاروں نے سردیاں آنے سے قبل ہی سوئی گیس استعمال کرنے کے نرخوں میں بے تحاشہ اضافہ اور صارف کے ملکیتی میٹر کا کرایہ ایک ہزار روپے مقرر کر کے غریب صارفین پر ظلم کی ایک نئی تاریخ رقم کر دی ہے۔
صارفین نے کہا کہ محکمہ سوئی نادرن گیس نے گیس کے انتہائی زیادہ ریٹ بڑھا کر صارفین کی زندگی اجیرن بنا کر رکھ دی ہے،لوڈ شیڈنگ اور گیس کے بلوں میں ظالمانہ اضافہ کر کے صارفین کی چیخیں نکلوادی ہیں۔
سینکڑوں متاثرین گیس نے سوئی نادرن گیس کے اعلی حکام سے نوٹس کا مطالبہ کیا ہے۔
تازہ ترین خبروں کیلئے ہمیں گوگل نیوز پر فالو کریں
