جہلم کے قبرستانوں میں آوارہ کتوں کی بھرمار، قبروں کی بے حرمتی، شہری خوفزدہ
جہلم شہر اور گردونواح کے قبرستانوں میں آوارہ کتوں کی بڑھتی تعداد نے شہریوں کو شدید پریشانی میں مبتلا کر دیا ہے جبکہ قبروں کی بے حرمتی کے واقعات بھی سامنے آنے لگے ہیں۔
جہلم شہر کے مختلف قبرستانوں میں آوارہ کتے قبروں کو نقصان پہنچاتے اور انہیں اکھاڑتے دکھائی دیتے ہیں، جس سے نہ صرف قبروں کی بے حرمتی ہو رہی ہے بلکہ وہاں آنے والے افراد کو بھی خوف و ہراس کا سامنا ہے۔
شہریوں کا کہنا ہے کہ فاتحہ خوانی کے لیے آنے والے افراد آوارہ کتوں کی موجودگی کے باعث شدید پریشان ہیں۔ جب انہیں بھگانے کی کوشش کی جاتی ہے تو کتے بھونکنے لگتے ہیں، جس سے خدشہ پیدا ہوتا ہے کہ وہ کسی پر حملہ نہ کر دیں۔
علاقہ مکینوں، سماجی اور فلاحی حلقوں نے ڈپٹی کمشنر جہلم سے فوری نوٹس لینے کا مطالبہ کرتے ہوئے کہا ہے کہ قبرستانوں میں آوارہ کتوں کے خاتمے کے لیے مؤثر اقدامات کیے جائیں تاکہ شہری سکون کے ساتھ اپنے پیاروں کی قبروں پر جا سکیں۔
