جہلم کا 33 سالہ نوجوان بھی یونان کشتی حادثے کا شکار، تاحال لاپتہ

3

پنڈدادنخان: جہلم کی تحصیل پنڈدادنخان کا 33 سالہ نوجوان بھی یونان کشتی حادثے کا شکار ہو گیا۔

تفصیلات کے مطابق یونان کشتی حادثے میں ڈوبنے والے درجنوں پاکستانی تاحال لاپتا ہیں، ان میں جہلم کی تحصیل پنڈدادنخان کے علاقہ سگھرپور کا 33 سالہ محمد اویس ولد سکندر حیات بھی شامل ہے جس کا ابھی تک پتا نہیں چلا۔

چند روز قبل یونان کشتی حادثے میں لاپتہ ہونے والا محمد اویس بھی دو ماہ پہلے گھر سے نکلا تھا اور ڈنکی لگا کر یورپ جانے کے لئے بدقسمت کشتی میں سوار تھا۔ اویس سنہرے مستقبل کے خواب سجائے یونان کشتی حادثے کا شکار ہوگیا ہے۔

محمد اویس کے بھائی وقاص کے مطابق کشتی حادثہ میں بچ جانے والے منڈی بہاؤالدین کے رشتہ دار نوجوان نے محمد اویس کی سمندر میں گمشدگی کی تصدیق کی ہے۔

پنڈدادنخان کے علاقہ سگھرپور کے محمد اویس کی پانچ سال قبل شادی ہوئی تھی اور اس کی تین سال کی بچی ہے۔

ذرائع سے معلوم ہوا ہے کہ محمد اویس تقریباً دو ماہ قبل ایجنٹ کے ذریعے دبئی سے ہوتے ہوئے سعودی عرب اور پھر لیبیا پہنچا۔ لیبیا سے وہ اپنے گروپ کے ساتھ سمندر عبور کرنے کی کوشش کر رہا تھا کہ کشتی کو حادثہ پیش آیا۔