رمضان پیکیج کیلئے کس طرح اپلائی کریں؟جانئے

جہلم: پنجاب حکومت کی جانب سے صوبے بھر کے مستحق گھرانوں کو نگہبان رمضان پیکیج دینے کا فیصلہ کیا گیا ہے ۔

تفصیلات کے مطابق وزیراعلیٰ پنجاب مریم نواز کی زیر صدارت خصوصی اجلاس منعقد ہوا، جس میں صوبے بھر میں لاکھوں خاندانوں کو نگہبان رمضان پیکیج دینے کا فیصلہ کیا گیا۔

اجلاس میں شریک ارکان کی جانب سے نگہبان رمضان پیکج کے حوالے سے مختلف تجاویز اور سفارشات پیش کی گئیں اور ان کا جائزہ لیا گیا، جبکہ وزیر اعلیٰ پنجاب مریم نواز نے پیکیج میں شفافیت کیلئے ضروری اقدامات کا حکم بھی دیا۔

اجلاس میں خطاب کرتے ہوئے مریم نواز نے کہا کہ نگہبان رمضان پیکیج نادار اور مستحق لوگوں کا حق اور حکومت کا فرض ہے۔ اس پیکیج سے مستفید ہونے کیلئے عوام کا لمبی قطاروں میں لگنا ہرگز پسند نہیں،لوگوں کو عزت اور احترام کے ساتھ ان کا حق ملنا چاہیے۔

وزیر اعلیٰ پنجاب نے کہا کہ نگہبان رمضان پیکیج کیلئے شہریوں کی رجسٹریشن کی جائے اور اس عمل کو 15 فروری تک مکمل کر کے رپورٹ پیش کی جائے۔

انہوں نے کہا کہ رمضان المبارک میں اللہ تعالیٰ کی رضا کیلئے عوام کی خدمت کی جائے۔ انتظامیہ اور متعلقہ حکام فرض نہیں بلکہ عبادت سمجھ کر اپنی ذمہ داریاں سر انجام دیں۔

واضح رہے کہ اس سے قبل اجلاس میں متعلقہ افسران نے بریفنگ دیتے ہوئے کہا کہ نگہبان رمضان پیکیج کیلئے پی ایس ای آر میں رجسٹریشن ضروری ہے۔

اجلاس میں بتایا گیا کہ رجسٹریشن کیلئے گھر بیٹھے آن لائن پورٹل پر بھی اپلائی کیا جا سکتا ہے۔ علاوہ ازیں یونین کونسل اور بلدیہ دفاتر میں بھی رجسٹریشن کرائی جا سکتی ہے جبکہ نگہبان رمضان پیکج کیلئے ہیلپ لائن 080002345 بھی قائم کر دی گئی ہے۔