پنجاب کے کن علاقوں میں بارش برسنے کا امکان ہے؟
محکمہ موسمیات کے مطابق بارش برسانے والا نیا موسمی نظام پنجاب میں داخل ہوگیا ہے جس کے باعث گوجرانوالہ، راولپنڈی اور پوٹھوہار ڈویژن سمیت متعدد اضلاع میں ہلکی بارش کا امکان ہے۔
محکمہ موسمیات کے مطابق آج علاقے میں بادل چھائے رہیں گے تاہم بیشتر علاقوں میں بارش کے امکانات کم ہیں۔ توقع ہے کہ موجودہ سسٹم اتوار کی رات تک پاکستان سے باہر نکل جائے گا جس سے مزید بارشوں کے امکانات کم ہوجائیں گے۔
جہلم میں کم سے کم درجہ حرارت 8 ڈگری سینٹی گریڈ ریکارڈ کیا گیا ہے جبکہ زیادہ سے زیادہ درجہ حرارت 24 ڈگری سینٹی گریڈ تک جانے کا امکان ہے۔ بارشیں نہ ہونے کی وجہ سے لاہورشہر خشک اور سرد موسم کی لپیٹ میں ہے، امکان ہے کہ یہ رجحان جاری رہے گا، کیونکہ ماہرین نے اس سال سرد موسم کے مختصر دورانیے کی پیش گوئی کی ہے۔
محکمہ موسمیات نے سردی بڑھنے کا امکان ظاہر کیا ہے تاہم موسلا دھار بارش کے کوئی امکانات نہیں ہیں۔
محکمہ موسمیات کے مطابق گزشتہ روز لاہور سمیت پنجاب کے مختلف اضلاع میں موسم میں تبدیلی دیکھنے میں آئی تھی جب کہ سردی اور مطلع ابرآلود رہا ہے۔
محکمہ موسمیات نے آئندہ دو روز کے دوران لاہور سمیت پنجاب کے دیگر علاقوں میں مطلع ابرآلود رہنے کی بھی پیش گوئی کی ہے۔
لاہور میں کم سے کم درجہ حرارت 8 ڈگری سینٹی گریڈ تک گر گیا ہے جبکہ زیادہ سے زیادہ درجہ حرارت 24 ڈگری سینٹی گریڈ تک پہنچنے کا امکان ہے۔
