جہلم پولیس کا جرائم پیشہ عناصر کے خلاف کریک ڈاؤن، 4 ملزمان منشیات اور اسلحہ سمیت گرفتار

جہلم پولیس نے جرائم پیشہ عناصر کے خلاف کریک ڈاؤن کرتے ہوئے 4 ملزمان کو منشیات اور اسلحہ سمیت گرفتار کر لیا۔

تفصیلات کے مطابق ڈسٹرکٹ پولیس آفیسر جہلم طارق عزیز سندھو کی ہدایت پر پولیس نے جرائم پیشہ عناصر کے خلاف بھرپور کریک ڈاؤن جاری رکھا ہوا ہے۔ تھانہ کالا گجراں اور تھانہ سول لائنز پولیس نے متعدد کامیاب کارروائیاں کرتے ہوئے منشیات فروشوں، ناجائز اسلحہ رکھنے والے اور شراب سپلائی کرنے والے ملزمان کو گرفتار کر کے بھاری مقدار میں منشیات، اسلحہ اور شراب برآمد کر لی۔

ایس ایچ او تھانہ کالا گجراں اور ان کی ٹیم نے کامیاب کارروائی کرتے ہوئے منشیات فروش ملزم زریاب کو گرفتار کر لیا۔ ملزم کے قبضے سے 1 کلو 80 گرام ہیروئن برآمد ہوئی۔ پولیس نے ملزم کے خلاف انسداد منشیات ایکٹ کے تحت مقدمہ درج کر لیا ہے۔

ایک اور کارروائی کے دوران تھانہ کالا گجراں پولیس نے ملزم طارق پرویز کو گرفتار کیا۔ ملزم سے 30 بور کا ناجائز پسٹل بمعہ ایمونیشن برآمد ہوا۔ پولیس نے ملزم کے خلاف آرمز ایکٹ کے تحت مقدمہ درج کر لیا ہے۔

ڈی پی او کی خصوصی ہدایت پر کارروائی کرتے ہوئے تھانہ کالا گجراں پولیس نے شراب سپلائر ملزم سیف علی کو گرفتار کیا۔ ملزم کے قبضے سے 20 لیٹر شراب برآمد کی گئی اور اس کے خلاف بھی مقدمہ درج کر لیا گیا ہے۔

ادھر تھانہ سول لائنز پولیس نے بھی کامیاب کارروائی کے دوران منشیات فروش ملزم سکندر کو گرفتار کر لیا۔ ملزم سے 1 کلو 180 گرام ہیروئن برآمد ہوئی۔ پولیس نے ملزم کے خلاف انسداد منشیات ایکٹ کے تحت مقدمہ درج کر لیا ہے۔

ڈی پی او جہلم طارق عزیز سندھو کا کہنا ہے کہ منشیات فروش، ناجائز اسلحہ رکھنے والے اور شراب سپلائر معاشرے کا ناسور ہیں جن کے خلاف بھرپور کریک ڈاؤن جاری ہے۔ انہوں نے واضح کیا کہ جرائم پیشہ عناصر کے لیے جہلم میں کوئی جگہ نہیں، شہریوں کے تحفظ اور امن و امان کی بحالی کے لیے پولیس ہر ممکن اقدامات کر رہی ہے۔