رمضان المبارک کی آمد، اوسلو ٹاؤن ہال کی شاہراہ برقی قمقموں سے جگمگا اٹھی، وزیراعلیٰ کی مسلمانوں کو مبارکباد

اوسلو: اوسلو سٹی میونسپلٹی کے زیراہتمام ناروے کی تاریخ میں پہلی بار رمضان المبارک کی آمد پر اوسلو ٹاون ہال کے سامنے واقع سڑک پر چراغاں کر کے برقی قمقموں والے چاندوں سے مزین کر دیا گیا چراغاں کاافتتاح اوسلو کے چیف منسٹر آیرک لا سولبرگ نے کیا۔

تقریب میں مرد و خواتین اور بچوں سمیت پاکستانیوں اور دوسرے ملکوں کی مسلم کمیونٹی نے بڑی تعداد میں شرکت کی۔ رمضان المبارک کے سلسلے میں ٹاؤن ہال اورسڑک پر چراغاں ماہ رمضان کے اختتام تک رہے گا۔ تقریب سے اوسلو کے چیف منسٹر آیرک لا سولبرگ، ارشد جمیل ،معصوم زبیر اور دیگر نے خطاب کیا۔

اوسلو کے چیف منسٹر آیرک لا سولبرگ ،ارشد جمیل، طلعت محمود بٹ ،ڈاکٹر نیلم نےگفتگو کی ۔چیف منسٹر آیرک لا سولبرگ نے تقریب میں آئے تمام مسلمانوں کو خوش آمدید کہا اور رمضان المبارک کی مبارک باد دی۔

انہوں نے کہا کہ اوسلو ملٹی کلچرل سٹی ہے اور اس میں ہر کلچرکے لوگ رہتے ہیں، ہمیں سب کی عزت کرنی چاہئے، اوسلو ایک ایسا شہر ہے جو لفظی طور پر تنوع پر روشنی ڈالتا ہے، آپ تنوع کا ایک بہت اہم حصہ ہیں جو اوسلو کو اوسلو بناتا ہے،اس لیے میں بہت خوش ہوں کہ ہم نے یہاں ٹاؤن ہال کے باہر شاہراہ پررمضان لائٹنگ کا انتظام کیا ہے۔

ناروے کے سیاستدان طلت محمود بٹ نے کہا کہ اوسلو سٹی ہال کے باہر مسلم کمیونٹی اکٹھی ہوئی ہے اور مسلمانوں نے رمضان المبارک کو خوش آمدیدکرنے کیلئے اوسلو سٹی ہال کے باہر چراغاں کیا ہے، طلعت محمود بٹ نے کہا کہ انتخابی مہم کے دوران ہم نے اعلان کیا تھا کہ ناروے میں ہم برسر اقتدار آکر یہ سلسلہ شروع کریں گے اور الحمدللہ ہم نے یہ وعدہ پورا کر دیا اورناروے کی تاریخ میں پہلی بار رمضان المبارک کی آمد کے موقع پر مسلمانوں کے اعزاز میں چراغاں کا افتتاح کیا گیا اور اس تقریب میں بہت بڑی تعداد میں پاکستانیوں سمیت دوسرے ملکوں کے مسلمانوں نے شرکت کی ۔

ارشد جمیل نے کہا کہ بہت خوشی کا دن ہے،ناروے کی تاریخ میں اوسلو میں پہلی بار اوسلوسٹی ہال کے باہر رمضان کے حوالے سے چراغاں کیا گیا اور یہ ہمارے لیے خوشی کا موقع ہے اور ہم اللہ کا شکر ادا کرتے ہیں،پہلی بار محسوس ہو رہا ہے کہ آپ کو واقعی ’’تسلیم‘‘ گیا ہے اور ناروے میں مسلمانوں کیلئے بہت سہولتیں ہیں، یہ ’’کھلے ذہن‘‘ کا معاشرہ ہے اور اس پر ہمیں اور زیادہ کام کرنے کی ضرورت ہے اور اگر ہم صحیح طریقے سے کام کریں گے تو ہم اپنا پیغام عام کر سکتے ہیں میں اوسلو میونسپلٹی اور چیف منسٹر کا شکر گزار ہوں جنہوں نے رمضان المبارک کی آمد پر چراغاں کر کے مسلمانوں کو رمضان المبارک کی مبارکباد دی۔

ڈاکٹر نیلم نےکہا کہ میں اپنی والدہ اور بچوں کے ساتھ اس تقریب میں آئی ہوں میری امی کو ناروے آئے ہوئے 50 سال ہوگئے ہیں اور میں ناروے پیدا ہوئی ہوں اور ہماری زندگی میں آج پہلی بار رمضان المبارک کی آمد کے موقع پر مسلمانوں کو خوش آمدید کرنے کے لیے یہ چاند ستارے روشن ہوئے جس کی ہم سب کو بہت خوشی ہے ،یہ لندن اور دوسرے ملکوں میں پہلے بھی ہو چکا ہے اور ناروے میں یہ پہلی بار ہو رہا ہے اور ہمیں امید ہے کہ مستقبل میں بھی اسی طرح کے مسلمانوں کے اعزاز میں ایسے پروگرام ہوتے رہیں گے، اتنی سردی کے باوجود بھی ہم آج کے اس ایونٹ میں شریک ہیں اور اس تقریب میں بہت زیادہ تعداد میں مسلمانوں نے شرکت کی ہے، اس موقع پر ان کی والدہ نے بھی تمام مسلمانوں کو رمضان المبارک کی مبارک باد دی۔

معصوم زبیر نے کہا کہ میں آج یہاں اس حقیقت کی نشاندہی کرنےکیلئےکھڑا ہوں کہ اوسلو میونسپلٹی ہم سب کے ساتھ رمضان کو منانا چاہتی ہے، یہ ایک تاریخی لمحہ ہے جہاں اوسلو شہر مل کر ایک زیادہ جامع اور متنوع مستقبل کی طرف ایک اہم قدم اٹھاتا ہے،اوسلو سٹی ہال کے باہررمضان کی روشنی کے ساتھ،ہم کمیونٹی کوایک طاقتور پیغام بھیجتے ہیں، یہ اس بات کی علامت ہے کہ ہم بطور شہری ایک ساتھ کھڑے ہیں ،رمضان کا مہینہ ایک مقدس مہینہ ہے جو رحمت اور یکجہتی سے بھرا ہوا ہے،معصوم زبیر کا یہ بھی کہنا تھاکہ یہ دیکھنا دل کو چھونے والا ہے کہ ہمارا شہر اوسلو تمام سماجی گروپوں کو شامل کرنا چاہتا ہے۔