پنڈدادنخان میں میونسپل کمیٹی کی ملکیتی دکانوں کے کرایوں میں اضافے کے خلاف تاجروں کی ریلی

پنڈدادنخان: میونسپل کمیٹی کی ملکیتی دکانوں کے کرایوں میں اچانک سینکڑوں فیصد اضافے کے خلاف پنڈدادنخان کے مقامی تاجروں نے ہفتہ 27 فروری کو سہ پہر 3 بجے شالیمار چوک میں ایک پرامن ریلی نکالی، جو بعد ازاں جلسے کی صورت اختیار کر گئی۔

تاجروں کا کہنا تھا کہ پنڈدادنخان ایک پسماندہ تحصیل ہے جہاں متوسط طبقے کے دکاندار محدود وسائل کے ساتھ اپنا روزگار چلا رہے ہیں، اس لیے 10 فیصد سے زائد اضافہ ناقابلِ برداشت ہے۔ انہوں نے وزیر اعلیٰ پنجاب مریم نواز شریف سے اپیل کی کہ اگر کرایوں میں اضافہ ناگزیر ہو تو اسے 10 فیصد تک محدود رکھا جائے اور سابقہ شیڈول کے مطابق نافذ کیا جائے۔

تاجر برادری نے تحصیل ایڈمنسٹریٹر نادیہ پروین سے مطالبہ کیا کہ طویل عرصے سے زیرِ استعمال دکانوں کے لیے باقاعدہ تحریری معاہدے کیے جائیں۔ ان کا کہنا تھا کہ ماضی میں جمع کرائی گئی سیکیورٹی رقوم کی رسیدیں فراہم نہیں کی گئیں، لہٰذا پرانے ریکارڈ کی بنیاد پر نئے معاہدے کیے جائیں اور کرایہ داروں کو قانونی تحفظ دیا جائے۔ تاجروں نے مطالبات کی منظوری تک جدوجہد جاری رکھنے کا اعلان بھی کیا۔

مرکزی انجمن تاجران پنڈدادنخان کے صدر چوہدری زبیر جمیل نے ملکی صورتحال پر گفتگو کرتے ہوئے پاک فوج کے اقدامات کی حمایت کا اظہار کیا اور عاصم منیر کی قیادت میں پاک فوج کے کردار کو سراہا۔ ریلی کے دوران شرکاء نے “پاک فوج زندہ باد، پاکستان پائندہ باد” کے نعرے لگائے۔

مقررین نے میونسپل کمیٹی سے مطالبہ کیا کہ کرایوں کا تعین سابقہ معاہدوں کے مطابق کیا جائے اور یکدم اضافہ واپس لیا جائے۔

ریلی کے پرامن اختتام پر ملک و قوم کی سلامتی کے لیے خصوصی دعا کی گئی۔