رمضان المبارک میں کم آمدنی والے طبقے کو موثر ریلیف دینا انتظامیہ کی اولین ترجیح ہے، میر رضا اوزگن
جہلم: میر رضا اوزگن ڈپٹی کمشنر جہلم نے کہا ہے کہ وزیر اعلیٰ پنجاب مریم نواز شریف کی ہدایت کی روشنی میں رمضان المبارک کے دوران کم آمدنی والے طبقے کو بروقت اور موثر ریلیف فراہم کرنا ضلعی انتظامیہ کی اولین ذمہ داری ہے جبکہ رمضان پیکیج 2026 اسی سلسلے کی ایک اہم کڑی ہے۔
ان خیالات کا اظہار انہوں نے جہلم پریس کلب کے صحافیوں چوہدری عابد محمود، عامر کیانی، الیاس صادق وٹو، مرزا قدیر بیگ، چوہدری مہربان حسین، وسیم قریشی، ڈاکٹر اعجاز اعوان، ملک فدا حسین، چوہدری تصور حسین، چوہدری دانیال عابد، عبدالرحمن قادری، مقصود احمد نقیبی، منور حسین اور مہر حیدر علی سے کانفرنس ہال میں منعقدہ میڈیا بریفنگ کے دوران کیا، جہاں انہوں نے رمضان پیکیج کی تفصیلات سے آگاہ کیا۔
ڈپٹی کمشنر جہلم نے بتایا کہ ضلع بھر میں رمضان سہولت بازار قائم کر دیے گئے ہیں، جہاں آٹا، چینی، دالیں، گھی، چکن، گائے اور بکرے کا گوشت سمیت دیگر اشیائے خوردونوش مارکیٹ ریٹ سے 10 سے 20 فیصد کم قیمت پر دستیاب ہیں۔ انہوں نے واضح کیا کہ ذخیرہ اندوزی اور منافع خوری میں ملوث عناصر کے خلاف فوری اور سخت کارروائیاں عمل میں لائی جا رہی ہیں تاکہ عوام کو حقیقی ریلیف فراہم کیا جا سکے۔
میر رضا اوزگن نے مزید بتایا کہ حکومت کی جانب سے ضلع جہلم کے ہزاروں مستحق گھرانوں کو خصوصی رمضان کارڈز جاری کر دیے گئے ہیں، جن کے ذریعے وہ رمضان پیکیج سے براہِ راست مستفید ہو سکیں گے۔ انہوں نے اس عزم کا اعادہ کیا کہ ضلعی انتظامیہ رمضان المبارک کے دوران عوام کو زیادہ سے زیادہ سہولیات فراہم کرنے کے لیے مکمل طور پر متحرک ہے اور کسی قسم کی کوتاہی برداشت نہیں کی جائے گی۔
