خاندانی منصوبہ بندی اور صحت ماں و بچہ کے لیے سماجی رویوں میں تبدیلی وقت کی اہم ضرورت
جہلم: خاندانی منصوبہ بندی اور صحتِ ماں و بچہ کے فروغ کے لیے سماجی رویوں میں مثبت تبدیلی کو وقت کی اہم ضرورت قرار دیتے ہوئے محکمہ صحت و آبادی کے زیرِ اہتمام جہلم میں ایک روزہ “ایجوکیشنل فیملی میلہ” کا شاندار انعقاد کیا گیا۔
یہ میلہ وزیر اعلیٰ پنجاب مریم نواز شریف کے پاپولیشن مینجمنٹ وژن اور ڈائریکٹوریٹ جنرل پاپولیشن ویلفیئر پنجاب کی ہدایات کی روشنی میں میجر اکرم شہید پارک جہلم میں منعقد ہوا، جس میں شہریوں، فیملیز اور بچوں کی بڑی تعداد نے بھرپور شرکت کی۔
تقریب کے مہمانِ خصوصی یاسر اقبال (ڈپٹی ڈائریکٹر پروکیورمنٹ، ڈائریکٹوریٹ جنرل پاپولیشن ویلفیئر) تھے، جبکہ خضر حیات، میمونہ انجم، سعید احمد اور فرحت کمال ضیاء نے بطورِ اعزازی مہمان شرکت کی۔
میلے کا بنیادی مقصد شہریوں کو آبادی میں تیزی سے اضافے کے سماجی و معاشی اثرات، خاندانی منصوبہ بندی کی اہمیت اور صحتِ ماں و بچہ سے متعلق آگاہی فراہم کرنا تھا۔ شرکاء کی دلچسپی کے لیے جھولے، ڈھول پرفارمنس، جھومر، میوزیکل چیئر، کوئز مقابلے، صحت مند ماؤں اور بچوں کے مقابلے اور رسہ کشی جیسے رنگا رنگ پروگرام منعقد کیے گئے، جن سے شرکاء خوب محظوظ ہوئے۔
محکمہ صحت و آبادی، صنعت زار اور ریسکیو 1122 کی جانب سے قائم آگاہی اسٹالز پر شہریوں کو مفت طبی معائنہ، ادویات کی فراہمی اور ہنگامی طبی امداد سے متعلق عملی تربیت فراہم کی گئی۔ اس کے علاوہ خواتین اور بچوں کی دلچسپی کے لیے چوڑیوں اور مہندی کے اسٹالز، بچوں کے کھلونوں کے اسٹالز اور مختلف اقسام کے فوڈ اسٹالز بھی لگائے گئے، جس سے میلے کا ماحول خوشگوار اور فیملی فرینڈلی بن گیا۔
اس موقع پر مہمانانِ خصوصی نے خطاب کرتے ہوئے کہا کہ آبادی اور وسائل میں توازن برقرار رکھنے کے لیے عوامی رویوں میں مثبت تبدیلی ناگزیر ہے جبکہ حکومتِ پنجاب عوام کی فلاح و بہبود کے لیے عملی اقدامات تسلسل کے ساتھ جاری رکھے ہوئے ہے۔
میلے کے اختتام پر ڈسٹرکٹ پاپولیشن ویلفیئر آفیسر جہلم حسن خالد وڑائچ نے تمام مہمانانِ خصوصی اور شرکاء کا شکریہ ادا کیا۔ بعد ازاں پوزیشن ہولڈرز میں انعامات جبکہ معزز مہمانوں میں یادگاری شیلڈز تقسیم کی گئیں، جس کے ساتھ یہ بامقصد تقریب خوشگوار ماحول میں اختتام پذیر ہوئی۔
