موٹروے پولیس نے موسم سرما میں دھند کے پیش نظر شہریوں کے لیے اہم سفری ہدایات جاری کر دیں

2

جہلم: نیشنل ہائی ویز اینڈ موٹروے پولیس نے موسم سرما میں بڑھتی ہوئی دھند کے پیش نظر شہریوں کی جان و مال کے تحفظ کو یقینی بنانے کے لیے اہم سفری ہدایات اور احتیاطی تدابیر جاری کی ہیں۔

موٹروے پولیس کے مطابق دھند کی وجہ سے قومی شاہراہوں پر ڈرائیورز کی حد نگاہ میں نمایاں کمی واقع ہوتی ہے، جس کے نتیجے میں حادثات کا خدشہ بڑھ جاتا ہے۔ شہریوں کی حفاظت کے پیش نظر شدید دھند کی صورت میں موٹرویز کو عارضی طور پر ٹریفک کے لیے بند بھی کیا جا سکتا ہے۔

موٹروے پولیس نے شہریوں سے اپیل کی ہے کہ وہ دھند کے موسم میں صبح 10 بجے سے رات 8 بجے کے درمیان سفر مکمل کریں اور ممکنہ حد تک رات کے وقت سفر سے گریز کریں، تاکہ موٹروے کی بندش کی صورت میں پیش آنے والی مشکلات سے بچا جا سکے۔

شہریوں کو ہدایت کی گئی ہے کہ وہ احتیاطی تدابیر اپنائیں، ہائی بیم لائٹس سے گریز کریں اور ڈرائیونگ کے دوران فاصلہ برقرار رکھیں تاکہ حادثات سے بچا جا سکے۔