شہریوں کے تعاون سے جہلم کو ایک محفوظ اور مثالی ٹریفک نظام فراہم کیا جا سکتا ہے، ڈی ایس پی ٹریفک خرم ستی
جہلم: ڈسٹرکٹ پولیس آفیسر جہلم طارق عزیز سندھو کی خصوصی ہدایات پر ٹریفک پولیس جہلم نے شہر بھر میں ٹریفک نظام کی بہتری کے لیے بھرپور اقدامات شروع کر دیے ہیں۔
ڈی ایس پی ٹریفک خرم ستی کی قیادت میں ٹریفک پولیس اہلکاروں کو تمام اہم چوک، چوراہوں اور مرکزی سڑکوں پر تعینات کر دیا گیا ہے تاکہ شہریوں کو ٹریفک کے بہاؤ میں رکاوٹوں سے بچایا جا سکے اور سفر کو آسان بنایا جا سکے۔
پولیس کے مطابق ہیوی ٹریفک کے شہر میں داخلے پر مکمل پابندی عائد کر دی گئی ہے، جبکہ مخصوص اوقات میں صرف مقررہ روٹس پر ہیوی گاڑیوں کو داخلے کی اجازت دی جا رہی ہے۔ اس اقدام سے سڑکوں پر دباؤ کم ہوا ہے اور حادثات کی شرح میں کمی دیکھنے کو ملی ہے۔
ٹریفک قوانین کی خلاف ورزی پر بھی سخت کارروائی جاری ہے۔ شاندار چوک اور دیگر مرکزی علاقوں میں غلط پارکنگ کے خلاف آپریشن کے دوران گاڑیوں کو لفٹر کی مدد سے ہٹا کر بند کیا جا رہا ہے جبکہ مالکان کو جرمانے کیے جا رہے ہیں۔
اس کے علاوہ بغیر ہیلمٹ موٹر سائیکل سواروں کے خلاف کریک ڈاؤن جاری ہے۔ کم عمر اور ناتجربہ کار ڈرائیورز کو سڑک پر آنے سے روکا جا رہا ہے۔ گاڑیوں اور موٹر سائیکلوں کے کاغذات، رجسٹریشن اور ڈرائیونگ لائسنس کی سخت چیکنگ کی جا رہی ہے۔
شہری حلقوں نے ٹریفک پولیس کی ان کارروائیوں کو خوش آئند قرار دیتے ہوئے کہا کہ ان اقدامات سے شہر میں ٹریفک کی روانی بہتر ہوئی ہے اور عوامی شکایات میں نمایاں کمی آئی ہے۔
ڈی ایس پی ٹریفک خرم ستی نے شہریوں سے اپیل کی ہے کہ وہ ٹریفک قوانین پر عمل کریں، ہیلمٹ کا استعمال یقینی بنائیں اور کم عمر افراد کو گاڑیاں چلانے سے روکیں تاکہ قیمتی جانوں کے تحفظ کو یقینی بنایا جا سکے۔ ان کا کہنا تھا کہ شہریوں کے تعاون سے جہلم کو ایک محفوظ اور مثالی ٹریفک نظام فراہم کیا جا سکتا ہے۔
