اسسٹنٹ کمشنر دینہ اور ڈی ایس پی کا دینہ کے مختلف علاقوں کا دورہ، محرم الحرام کے جلوس روٹس کا معائنہ کیا
دینہ: محرم الحرام کے پیش نظر اسسٹنٹ کمشنر دینہ صفاء عابد اور ڈی ایس پی صدر جہلم شہباز ہنجرا نے دینہ اور گردونواح کے علاقوں میں جلوس کے چھ اہم مقامات کے روٹس کا تفصیلی دورہ کیا۔
دورے کا مقصد سیکیورٹی، صفائی ستھرائی اور دیگر انتظامات کا جائزہ لینا تھا تاکہ محرم الحرام کے جلوسوں کے دوران شہریوں کو کسی قسم کی دشواری کا سامنا نہ ہو۔
ڈپٹی کمشنر جہلم میثم عباس کی ہدایت پر اسسٹنٹ کمشنر صفاء عابد، ڈی ایس پی صدر شہباز ہنجرا، چیف آفیسر میونسپل کمیٹی محمد فیصل اور ایس ایچ او تھانہ دینہ راجہ ایاز محمود نے جلوس کے روٹس کا معائنہ کیا۔ دورے کے دوران قلعہ روہتاس، دھنیالہ، اسد آباد، شیخوپور، چک عبدالخاق، ہڈالہ سیداں اور مفتیاں سے سید حسین تک کے روٹس شامل تھے۔
اسسٹنٹ کمشنر دینہ صفاء عابد نے جلوس گزرگاہوں میں گلیوں اور سڑکوں کی صورتحال کا بغور جائزہ لیا اور صفائی ستھرائی کے ناقص انتظامات پر موقع پر ہی احکامات جاری کیے۔ انہوں نے متعلقہ محکموں کو ہدایت دی کہ محرم کے ایام میں جلوسوں کی راہ میں کسی قسم کی رکاوٹ نہ ہو، اور سیکیورٹی، روشنی، پانی اور صفائی کے تمام انتظامات مکمل کیے جائیں۔
ڈی ایس پی شہباز ہنجرا نے کہا کہ جلوسوں کی سیکیورٹی کو یقینی بنانے کے لیے پولیس کی نفری تعینات کر دی جائے گی اور کسی بھی ناخوشگوار واقعے سے نمٹنے کے لیے مکمل الرٹ رہیں گے۔
انتظامیہ اور پولیس کے اس مشترکہ دورے کو عوامی سطح پر سراہا جا رہا ہے اور شہریوں نے امید ظاہر کی ہے کہ اس مرتبہ محرم الحرام کے دوران امن و امان اور سہولت کے لحاظ سے بہترین انتظامات دیکھنے کو ملیں گے۔
