ڈپٹی کمشنر نے دریائے جہلم، نہروں اور ندی نالوں میں نہانے پر مکمل پابندی عائد کر دی
جہلم: ڈپٹی کمشنر جہلم نے دفعہ 144 نافذ کرتے ہوئے دریائے جہلم، نہروں، ڈیموں اور تالابوں میں نہانے پر پابندی عائد کر دی۔
تفصیلات کے مطابق ڈپٹی کمشنر جہلم محمد میثم عباس نے ضلع بھر میں گرمیوں کی چھٹیوں اور عوامی تعطیلات کے دوران دریاؤں، نہروں، ڈیموں اور تالابوں میں نہانے کے بڑھتے ہوئے رجحان اور اس کے نتیجے میں انسانی جانوں کے ضیاع کے پیش نظر فوری اقدامات اٹھاتے ہوئے دفعہ 144 کے تحت تیرنے پر مکمل پابندی عائد کر دی ہے۔
22 مئی کو جاری کیے گئے سرکاری نوٹیفکیشن کے مطابق یہ پابندی ضلع جہلم کی تمام حدود میں نافذ العمل ہو گی اور اس کا اطلاق 30 دنوں کے لیے یعنی 22 مئی 2025 سے 21 جون 2025 تک جاری رہے گا۔ اس دوران کوئی بھی شخص دریا، نالہ، نہر یا دیگر پانی کے ذخائر میں نہا یا تیر نہیں سکے گا۔
نوٹیفکیشن میں واضح کیا گیا ہے کہ دفعہ 144(6) تعزیراتِ پاکستان 1898 (ترمیم شدہ، پنجاب گزٹ 17 اکتوبر 2024) کے تحت یہ حکم جاری کیا گیا ہے، تاکہ عوامی تحفظ اور امن و امان کو یقینی بنایا جا سکے۔
حکم نامے میں یہ بھی درج ہے کہ اس پابندی کے دوران کسی قسم کی خلاف ورزی کی صورت میں قانونی کارروائی عمل میں لائی جائے گی، حتیٰ کہ اس حکم کے اختتام کے بعد بھی اگر اس کی خلاف ورزی سے متعلق کوئی کارروائی زیرِ سماعت ہو تو وہ موثر رہے گی۔
ڈسٹرکٹ پولیس، ریسکیو 1122، مجسٹریٹس، اور دیگر متعلقہ اداروں کو بھی اس پابندی پر عمل درآمد کو یقینی بنانے کی ہدایات جاری کر دی گئی ہیں۔
