ڈاکوؤں نے پنڈدادنخان سے جلالپور شریف جانیوالی بس لوٹ لی
پنڈدادنخان سے جلالپور شریف جانے والی مسافر بس میں مسلح ڈاکوؤں نے درجنوں مسافروں کو لوٹ لیا۔
یہ واردات گزشتہ شب پیش آئی جب مسافر بس جلالپور شریف کے لیے روانہ ہوئی۔ ذرائع کے مطابق ہرن پور کے مقام پر دو مسلح ڈاکو مسافروں کے بھیس میں بس میں سوار ہوئے اور کچھ دیر بعد جب بس آدوال سٹاپ پر پہنچی تو ان کے دو مزید ساتھی جو پہلے سے موٹرسائیکل پر موجود تھے بس میں سوار ہوگئے۔
ڈاکوؤں نے اسلحہ کے زور پر مسافروں کو یرغمال بنا لیا اور لاکھوں روپے نقدی، قیمتی موبائل فونز اور زیورات لوٹ لیے۔ مسافروں میں خوف و ہراس پھیل گیا جبکہ ڈاکو واردات کے بعد باآسانی فرار ہونے میں کامیاب ہوگئے۔
واقعہ کی اطلاع ملتے ہی پولیس موقع پر پہنچ گئی اور ملزمان کی تلاش کے لیے تحقیقات کا آغاز کر دیا گیا ہے۔ تاہم تاحال کوئی گرفتاری عمل میں نہیں آئی۔
شہریوں نے پولیس اور متعلقہ حکام سے مطالبہ کیا ہے کہ علاقے میں سیکیورٹی کو مزید سخت کیا جائے تاکہ آئندہ ایسے واقعات سے بچا جا سکے۔
