ڈسٹرکٹ پولیس آفیسر جہلم کا کیتھولک چرچ میں کھلی کچہری کا انعقاد
جہلم: ڈسٹرکٹ پولیس آفیسر جہلم ناصر محمود باجوہ نے کیتھولک چرچ نزد ایم پی چیک پوسٹ جہلم کینٹ میں کھلی کچہری منعقد کی۔
اس موقع پر ڈی ایس پی انویسٹی گیشن سرفراز احمد رانجھا، ایس ایچ او سٹی قمر سلطان، انچارج چوکی کینٹ نوید افضل اور انچارج میثاق سنٹر عاشر سلیم بھی موجود تھے۔
کھلی کچہری میں مسیحی برادری کی بڑی تعداد نے شرکت کی۔ کرسمس کی مناسبت سے ڈی پی او جہلم نے مسیحی کمیونٹی کے ساتھ کرسمس کا کیک کاٹا، مبارکباد دی اور نیک خواہشات کا اظہار کیا۔
شرکاء نے اپنے مسائل ڈی پی او کے سامنے پیش کیے جن پر انہوں نے فوری کارروائی کے احکامات جاری کرتے ہوئے موقع پر ہی ان کے حل کی یقین دہانی کروائی۔
اس موقع پر ڈی پی او جہلم ناصر محمود باجوہ نے کہا کہ اقلیتوں کے حقوق کا تحفظ ہماری آئینی ذمہ داری ہے، اور ہم آپ کی خوشیوں میں برابر کے شریک ہیں۔ مہذب قومیں خوشیوں کے تہوار مل جل کر مناتی ہیں جس سے حب الوطنی کے جذبات فروغ پاتے ہیں۔ پبلک سروس ڈلیوری کے معیار کو بہتر بنانا جہلم پولیس کی اولین ترجیحات میں شامل ہے۔
انہوں نے مزید بتایا کہ آئی جی پنجاب اور آر پی او راولپنڈی ڈویژن کی ہدایات پر جہلم میں کھلی کچہریوں کا انعقاد کیا جا رہا ہے تاکہ شہریوں کو ان کی دہلیز پر فوری اور مؤثر انصاف فراہم کیا جا سکے۔
مسیحی برادری نے جہلم پولیس کا شکریہ ادا کیا اور کہا کہ خوشیوں میں شریک ہونے سے بین المذاہب ہم آہنگی کو فروغ ملتا ہے۔
