15 دن سے سن رہے ہیں عدم اعتماد آ رہی ہے، اپوزیشن نے صرف سیاسی دکان چمکائی ہوئی ہے۔ فواد چوہدری

پنڈدادنخان: وفاقی وزیراطلاعات چوہدری فواد حسین نے کہا ہے کہ 15دن سے سن رہے ہیں عدم اعتماد آ رہی ہے، اپوزیشن نے صرف سیاسی دکان چمکائی ہوئی ہے، صورتحال سے لگتا ہے مارچ کیلئے بندے بھی ہم کو دینا پڑیں گے۔ جہانگیر ترین حکومت کے ساتھ ہیں،پاکستان آزاد خارجہ پالیسی پر عمل پیرا ہے، پاکستان نے ہمیشہ امن کیلئے کردار ادا کیا، وزیراعظم عمران خان ہمیشہ جنگ کے خلاف رہے ہیں۔

#APPNews : Federal Minister for Information and Broadcasting @fawadchaudhry talks to media #Pind Dadan Khanhttps://t.co/dT4KXFcj54

— APP 🇵🇰 (@appcsocialmedia) February 27, 2022

ان خیالات کا اظہار انہوں نے اتوار کو پنڈدادنخان میں میڈیا سے گفتگوکرتے ہوئے کیا۔ انہوں نے کہا کہ اپوزیشن کو نہیں پتہ ان کا لیڈر کون ہے، 15دن سے سن رہے ہیں عدم اعتماد آ رہی ہے، اپوزیشن نے صرف سیاسی دکان چمکائی ہوئی ہے، صورتحال سے لگتا ہے مارچ کیلئے بندے بھی ہم کو دینا پڑیں گے، جہانگیر ترین حکومت کے ساتھ ہیں۔

انہوں نے کہا کہ وزیراعظم عمران خان کا دورہ روس کامیاب رہا، پہلی بار آزاد خارجہ پالیسی دیکھنے کو ملی، پاکستا ن نے اپنے مفاد میں خارجہ پالیسی تشکیل دی ہے، پاکستان نے ہمیشہ امن کیلئے کردار ادا کیا، وزیراعظم عمران خان ہمیشہ جنگ کے خلاف رہے ہیں۔ دنیا اب سکڑ گئی ہے، روس اور یوکرین کے درمیان جنگ ہو رہی ہے، یوکرین،روس کشیدگی سے تیل اور اشیاء کی قیمتیں بڑھ گئیں،روس اور یوکرین 40 فیصد گندم پیدا کرتے ہیں۔

فواد چوہدری نے کہا کہ ہم چاہتے ہیں کہ یوکرین اور روس کے درمیان صورتحال جلد معمول پر آئے، یوکرین میں پھنسے پاکستانیوں کو نکالنے کیلئے تسلی بخش انتظامات کئے گئے ہیں، کسی بھی پاکستانی کو تکلیف نہیں پہنچی۔ وزیراعظم عمران خان دلیر، مضبوط اور قد آور رہنما ہیں، ان کے روس کے دورہ سے ان لوگوں کو پریشانی ہوئی جن کی دولت باہر ہے۔